Inaciu Galán y González

Na primavera de 2008 espublicé dellos poemes escoyíos por Xosé Bolado en Lliteratura. Agora tán colgaos na rede al traviés de Google llibros.

Espublizaos en mayu de 2008 en Lletres Asturianes 98, l'últimu que va dedicase a lliteratura, pola mor de l'apaición de la revista a parte Lletres Lliterariu. *por una errata apaezo como "Ignaciu" nesti númberu.

L'añu pasáu, Inacio Rodríguez-Solar y yo, escribimos dellos poemes a comuña, como un exerciciu lliterariu que mos prestaba facer. Espublizáronse dalgunos nel primer númberu de Lletres Lliterariu, agora puen consultase en Google-llibros, pa los que nun tenéis el trabayu en papel. Que presten.

27/06/2008 d'asturnews.com

La parroquia de La Collá, asitiada noreste del conceyu de Siero y na llinde de Xixón, Villaviciosa y Sariegu, acueye esti domingu a les a partir de les 12:30’l tradicional Homenaxe al Texu, organizáu pola Tertulia Cultural “El Garrapiellu”. Dientro d’esti actu va presentase’l llibru “Toponimia de la parroquia de la Collá”, asoleyáu pola Academia de la Llingua Asturiana nel númberu 120 de la colección “Toponimia”.

Nel actu van paticipar Xosé Ramón Iglesias Cueva en representación de l'Academia de la Llingua Asturiana, Rubén Magadán Cosío hestoriador y miembru de l'Asociación "Amigos de la Parroquia de La Collá" y Tino Lozano de la "Tertulia Cultural El Garrapiellu", amás de los astures del trabayu, Marta Lozano Carbajal ya Inaciu Galán y González.

El trabayu presentáu ganare’l concursu d’investigación toponímica de l’ALLA nel añu 2007 y recueye alredor de 400 topónimos de praos, caminos, regatos, montes y otros espacios de la parroquia, que recoyeron oralmente los autores. Xunto a esos nomes apaecen dellos datos llingüísticos sobre les peculiaridaes nesti campu dientro de la collación.

La Collá ye una de les ventiocho parroquies del conceyu de Siero, asitiada al nordeste del mesmu, a ocho quilómetros de La Pola, la capital del conceyu. Tien una superficie de 6’67 Km2 y una población d’unos 225 habitantes. La Parroquia ta formada polos barrios de Fresno, Güerbu, El Pibidal, La Collá Tras y Ceñal.

Otros nomes tradicionales de La Collá, como exemplu, son El Piñíu, L’Abregáu, La Berruga, Caflor, La Braña, El Camín de la H.uente, El cuitu, Casa Veneros, Los cierrucos, El Forcón, Fonfría, Los Ponticos, Les Xenres, El Xuanicu y una llarga riestra de topónimos que recueyen la riqueza llingüística, cultural y hestórica de la parroquia.

D'ente los trabayos de parroquies de Siero espublizaos, esti ye'l númberu cuatro. Tán asoleyaos na coleición los trabayos de Marcenao, Aramil y Santolaya.

Inaciu Galán coordina’l llibru de monólogos «Pa echar unes rises».
Portada del llibru «Pa echar unes rises».

de rtpa.es/ estayadasturianu.es
21-06-2008
L’escritor y presentador de televisión Inaciu Galán ta acabante poner nes llibreríes «Pa echar unes rises» (Trabe), un llibru qu’antologa dellos monólogos escritos por Cristina Muñiz Martín, Azucena Álvarez García, Isaac G. de L’Arada, Benxa Pérez, Chechu García y el propiu Galán y que busca consolidar lo que’l coordinador del mesmu llama «monólogu modernu», ello ye, un monólogu asturianu vertebráu según los esquemes tradicionales del xéneru pero adaptáu a les nueves circunstancies d’Asturies y a una mocedá urbano que nun ye quien a identificase colos textos que tradicionalmente se reciten nesti tipu d’espectáculos.

Nel prólogu, Galán escribe que “dende va unos años delles persones venimos trabayando na modernización d’un xéneru lliterariu y escénicu que s’espresó siempres n’Asturies na nuesa llingua con más que notable ésitu y que nes últimes décades taba perdiendo públicu ensin parar”. Pal coordinador del llibru, esta perda venía, per un llau, «pola desconexión temática y estética del monólogu tradicional asturianu col públicu más mozu y urbanu» y, per otru, «pola sustitución del xéneru tradicional asturianu por otru tipu d’humor: el monólogu “stand-up comedy”, ye dicir, les formes y temes del monólogu modernu y televisivu fechu nos Estaos Xuníos y, amás, en castellanu».

En definitiva, lo que se propón en «Pa echar unes rises» ye la tresllación de l’exitosu «stand-up comedy» a «la nuesa llingua y al nuesu contestu social; y d’otra banda, la modernización temática del monólogu tradicional asturianu». Galán añede que la so experiencia d’estos años diz que’l monólogu asturianu «va alitando pasu ente pasu y vuelve a ganar públicu», y recueye nel llibru qu’agora saca Ediciones Trabe dellos textos qu’amuesen el camín que ta siguiendo esi enfotu renovador del xéneru.

Fonte: http://www.estayadasturianu.es/detalleNoticia.php?id_g=1213962425&sec=10

Biblioasturias 4, 1er trimestre de 2007

------------------------------------------------------------------

Trismestre lliterariu. Novedaes

Ediciones Trabe pon en mercáu una variada collecha d’obres que pasen a formar parte d’esi corpus fundamental na bibliografía asturiana. Pa esti fondu d’armariu presenta na so colección Trabe diccionarios, la primer incursión en llingua inglesa col so Diccionariu Básicu Asturianu-Inglés, Inglés-Asturianu de Inaciu Galán y González. Contién anotaes unes 40.000 entraes de los dos idiomes y ye una erbía de fonda utilidá pa traductores y fonte de placer pa cualquier curiosu.

Asturnews 13 d'abril de 2006

--------------------------------------------------------------------

13/04/2006

Ediciones Trabe asoleya'l primer diccionariu Asturianu-Inglés / Inglés-Asturianu, trabayáu por Inaciu Galán y González, y introducíu por un entamu d'Ana Cano, presidenta de l'Academia de la Llingua Asturiana. Nesti diccionariu básicu, que tien unes 14.000 entraes y cerca de 40.000 acepciones, apaez un apéndice nel que figuren los númberos cardinales y una llista colos principales verbos irregulares ingleses.

Ediciones Trabe, que tien nel so catálogu dos de los meyores diccionarios qu'ofrez el mercáu asturianu (el Diccionariu asturianu castellanu de Xuan Xosé Sánchez Vicente, y el Diccionariu castellanu asturianu de sinónimos y equivalencies, de Luis Alberto Prieto), tien previsto espublicar esti mesmu añu'l so Diccionariu gaélicu-irlandés asturianu / asturianu gaélicu-irlandés, de Xuan Xosé Lajo, y un Diccionariu técnicu básicu de telecomunicaciones ya informática, de Pablo Suárez García.

Espublizada'l 20 d'abril de 2006 n'Asturies.com

----------------------------------------------------------------

Redacción

20/04/2006 Inaciu Galán y González presenta güei xueves día 20 d'abril el so “Diccionariu básicu asturianu-inglés / inglés asturianu” qu’asoleya la Editorial Trabe. Ello va ser a les 19:30h na Escuela d'Hostelería y Turismu de Xixón asitiada en Paséu Begoña. La obra, con un entamu de la presidenta de l’ALLA Ana Cano, tien sobre 14.000 entraes y 40.000 acepciones, xunta un apéndiz colos principales verbos irregulares ingleses.

Presentación Diccionariu asturianu-inglés/inglés-asturianu na Llibrería Ítaca de Xixón

-------------------------------------------------------------------
PRESENTACIÓN LLIBRU

'Diccionariu Básicu Asturiano - Inglés, Inglés - Asturiano'

INACIU GALÁN Y GONZÁLEZ

EDITORIAL TRABE

XUEVES, 4 DE MAYU - 20,00 HORES

Dientro del ámbitu de la Selmana de les Lletres preséntase na llibrería una de les obres más esperaes no que cinca al panorama filolóxicu asturianu. Nun ye sólo una mera curiosidá ensin más, de xuru que va a ser una ferramienta útil y didáutica pa muncha xente (traductores de obres en llingua inglesa, estudiantes,...)

Vamos poder contar cola presencia del autor, Inaciu Galán, a quien-y podremos facer toles entrugues que queramos al rodiu d'esti apasionante proyeutu.

Asina, que si vais dir a Londres o los Estaos Xuníos un día d'estos, ya sabeis, ¡a mercalu!

PRECIU: 12 €

- 10 % DÍA PRESENTACIÓN

Espublizáu en asturnews el 31 de xineru de 2008.

----------------------------------------------------------------
Inaciu Galán y Marta Lozano son los autores del trabayu espublizáu estos díes

Portada de la "Toponimia de la parroquia de la Collá (Siero)"

L’Academia de la Llingua Asturiana ta acabante d’asoleyar un númberu nuevu de la so coleición “Toponimia”, que recueye los topónimos menores de parroquies asturianes y que lleva con esti trabayu 120 entregues. Esta última entrega de la coleición correspuende a la parroquia de La Collá, asitiada en Siero. El trabayu ta firmáu por Inaciu Galán y Marta Lozano, que ganaren con esti trabayu’l concursu d’investigación de l’ALLA del añu 2007.

El trabayu recueye alredor de 400 topónimos de praos, caminos, regatos, montes y otros espacios de la parroquia, que recoyeron oralmente Inaciu Galán y Marta Lozano Carbajal. Xunto a esos nomes apaecen dellos datos llingüísticos sobre les peculiaridaes nesti campu dientro de la collación.

La Collá ye una de les ventiocho parroquies del conceyu de Siero, asitiada al nordeste del mesmu, a ocho quilómetros de La Pola, la capital del conceyu. Tien una superficie de 6’67 Km2 y una población d’unos 225 habitantes. La Parroquia ta formada polos barrios de Fresno, Güerbu, El Pibidal, La Collá Tras y Ceñal.

Una imaxe de La Collá

Otros nomes de La Collá, como exemplu, son El Piñíu, L’Abregáu, La Berruga, Caflor, La Braña, El Camín de la H.uente, El cuitu, Casa Veneros, Los cierrucos, El Forcón, Fonfría, Los Ponticos, Les Xenres, El Xuanicu y una llarga riestra de topónimos que recueyen la riqueza llingüística, cultural ya hestórica de la parroquia.

D'ente los trabayos de parroquies de Siero espublizaos, esti ye'l númberu cuatro. Tán asoleyaos na coleición los trabayos de Marcenao, Aramil y Santolaya.